काठमाडौं । सलोन बस्नेत र नम्रता श्रेष्ठ अभिनित फिल्म ‘रंगी’को पहिलो गीत ‘छ भने माया’ सार्वजनिक भएको छ । आइतबार आयोजित पत्रकार सम्मेलनमा दुर्गेश थापाको शब्द र संगीतमा रहेको गीत सार्वजनिक गरियो ।

गीतमा आनन्द कार्की र सुजाता केसीको स्वर छ । गीतमा फिल्मका प्रमुख कलाकार सलोन र नम्रतासहित दिलीप रायमाझी, आयुषी ढकाल, विशाल पहारी र उत्तम केसी फिचर्ड छन् ।

यो डान्सिङ ट्रयाकमा प्रेमभाव समेटिएको छ । नृत्य निर्देशन कविराज गहतराजको छ । गीत रिलिजपछि संगीतकार दुर्गेशले १० वर्षअघिको मेलोडीलाई गीतमा समेटेको बताए । उनले गायक आनन्द कार्कीजस्ता दिग्गज गायकलाई आफ्नो संगीत र शब्दमा समेट्नु आफ्नो लागि चुनौती भएको बताए ।

दुर्गेश र आनन्दले यसअघि ‘दुश्मन हेरेको हेर्‍यै’ गीतमा पनि सहकार्य गरेका थिए । प्रस्तुतकर्ता तथा अभिनेता सलोनले आफू अष्ट्रेलियामा रहँदा यो गीत भर्चुअल माध्यममार्फत सुनेको सम्झँदै राम्रो गीत दर्शकलाई दिन पाएकोमा खुसी जनाए ।

डेब्यु अभिनेत्री तथा पूर्वमिस नेपाल श्रेष्ठले सामाजिक कथाको फिल्ममा जोडिन पाउनु र डान्सिङ नम्बरको गीतमा काम गर्न पाउनु खुसीको कुरा भएको बताइन् । निर्मात्री करिश्मा केसीले पहिलो प्रयासलाई दर्शकले साथ दिनेमा ढुक्क रहेको बताइन् ।

निर्देशक सुरेश न्यौपानेले ‘रंगी’ सलोन र आफ्नो सोचको परिणाम रहेको बताउँदै दशकले सामाजिक कथासँगै हाँसो र रोदनको मिश्रण पाउने बताए । सान्भी इन्टरटेनमेन्ट प्रालिको व्यानरमा निर्माण भएको फिल्ममा दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको पनि अभिनय छ ।

सक्षम सुवेदी, करिश्मा केसी बस्नेत र अनिश गौतमको निर्माण रहेको फिल्ममा सुमन गजमेरको लेखन, सौरभ लामाको छायांकन, दुर्गेश थापा, आमेश भण्डारी र भीम बिसीको संगीत छ । फिल्मलाई एप्पल इन्टरटेनमेन्ट, एफडी र रिच इन्टरटेनमेन्टले वितरण गर्नेछन् ।