१५ पुस, दाङ । नेकपा एमालेका महासचिव शंकर पोखरेलले सामाजिक चुनौतीको सामना गर्न नेपालको शिक्षा प्रणाली निकै कमजोर रहेको बताएका छन् । जागिरका लागि भने नेपालको शिक्षा व्यवस्था ठिक भएको उनको भनाइ छ ।

दाङको घोराही रझेनामा रहेको श्री माध्यमिक विद्यालयको ६७औँ वार्षिकोत्सव समारोहलाई सोमबार सम्बोधन गर्दै महासचिव पोखरेलले उत्पादनका लागि, व्यापार, व्यवसायलगायतका क्षेत्रको लागि नेपालको शिक्षा व्यवस्था कमजोर भएको बताएका हुन् ।

नेपालको शिक्षा व्यवस्थाले नेपालमा रहेको स्रोतसाधनलाई अधिक प्रयोग गरेर काम गर्न सक्ने बनाउन नसकेको भन्दै उनले पढेका युवाले जागिर मात्र खोज्दा र उद्यमशीलतामा नजोडिँदो देशको विकास हुन नसकेको धारणा राखे ।

अबको शिक्षाले युवालाई व्यावसायिक कृषिमा उन्मुख गराउनुपर्ने उनले सुझाव दिए । ‘अब हाम्रो शिक्षाव्यवस्था ज्ञानसँगै सीप सिक्ने खालको हुनुपर्दछ,’ पोखरेलले भने, ‘त्यो क्षमता बालबालिकालाई सुरुदेखि नै सिकाउन सक्नुपर्दछ, होइन भने हाम्रो मुलुक श्रम बेच्ने मुलुक मात्र हुनेछ ।’