काठमाडौं । नेपाली कांग्रेसका नेता डा. शेखर कोइरलाले कैलालीको गेटा अस्पताल पूर्णरुपमा सञ्चालनका लागि पहल गर्ने बताएका छन् । आइतबार अस्पतालको अवलोकन गर्दै उनले गेटा स्वास्थ्य विज्ञान प्रतिष्ठान अघि बढाउन कुन प्रक्रियागत समस्याले रोकिएको हो भन्नेमा समेत चासो देखाएका छन् ।

डा. कोइरालाले सुदूरपश्चिमका नागरिकका लागि दिगो र बलियो स्वास्थ्य सेवा आवश्यक रहेको बताए । उनले अस्पतालका निर्देशक डा. अशोक श्रीपाइलीसहित अस्पतालका कर्मचारीसँग उनले छलफल गरे । निर्देशक डा. श्रीपाइलीले अस्पतालको शय्या क्षमता करिब ६०० रहेको जानकारी दिए ।

‘गेटा अस्पताल पूर्णरुपमा सञ्चालनमा ल्याउन सक्दो पहल गर्ने छु,’ डा. कोइरालाले भने, ‘ऐन, कानुन बनाउन ढिलाइ भइरहँदा कैलालीको गेटा मेडिकल कलेजलाई कसरी सञ्चालन गर्ने भन्ने विषयमा सरकारले कदम चाल्नुपर्ने छ ।’

ऐन अभावमा मेडिकल सञ्चालन गर्न समस्या भएपनि जनतालाई स्वास्थ्य सेवा दिन अस्पताललाई पूर्ण क्षमतामा चलाउन आफूले पहल गर्ने डा. कोइरालाले बताए ।

गेटामा अस्पताल, कलेज, छात्राबास, आवास भवनका अलावा अक्सिजन प्लान्ट, कुरुवा घर, शव घर, जस्ता संरचनाको निर्माण पूरा भइसकेको छ । चिकित्सा शिक्षा ऐनमा चिकित्सा शिक्षा पढाइ र अभ्यासका लागि कम्तीमा ३०० शय्याको अस्पताल चाहिने उल्लेख छ । गेटा अस्पतालले पछिल्लो समय ५० शय्या मात्रै सञ्चालनको अनुमति पाएको छ । प्रस्तावित विश्वविद्यालयमा पठनपाठन थालिहाल्न प्रादेशिक अस्पताललाई अभ्यासका लागि प्रयोग गर्न सकिने प्रदेश सरकारले जनाएको छ ।