भारत वा पाकिस्तान आयोजक रहँदा हुने दुई देशबीचको क्रिकेट खेल तटस्थ स्थानमा खेलिने
४ पुस, काठमाडौं । सन् २०२७ सम्म भारत र पाकिस्तानमा आयोजना हुने आइसीसीका विभिन्न प्रतियोगितामा हुने दुई देशबीचको क्रिकेट खेल तटस्थ स्थानमा खेलाइने भएको छ । आइसीसीले बिहीबार स्टेटमेन्ट जारी गर्दै यस्तो जनाएको हो ।
आगामी २०२५ फेब्रुअरीमा पाकिस्तानमा हुन लागेको आइसीसी च्याम्पियन्स ट्रफीको बेलादेखि अब यो लागु हुनेछ भने त्यसपछि भारतमा हुने आइसीसी महिला क्रिकेट विश्वकप र सन् २०२६ मा भारत र श्रीलंकामा हुने आइसीसी टी२० विश्वकपमा पनि यो नियम लागु हुनेछ ।
सन् २०२८ मा फेरि पाकिस्तानमा कुनै आइसीसी प्रतियोगिता गराउने छलफल पनि भइरहेको छ भने त्योबेला पनि यो तटस्थ स्थानको नियम लागु गराइन सक्नेछ ।
आगामी फेब्रुअरी-मार्चमा पाकिस्तानमा हुने आइसीसी च्याम्पियन्स ट्रफी ८ वर्षपछि हुन लागेको हो । सन् २०१७ को च्याम्पियन्स ट्रफी फाइनलमा भारतलाई हराउँदै पाकिस्तान च्याम्पियन बनेको थियो ।
च्याम्पिनयन्स ट्रफीमा पाकिस्तान, भारत, अस्ट्रेलिया, न्युजिल्याण्ड, इंग्ल्याण्ड, दक्षिण अफ्रिका, बंगलादेश र अफगानिस्तानको सहभागिता रहनेछ । तालिका सार्वजनिक हुन बाँकी छ ।
यसअघि सन् २०२३ मा पाकिस्तानम भएको एसीसी एसिया कपमा पनि भारतका खेलहरू श्रीलंकामा खेलिएको थियो ।
