२३ मंसिर, काठमाडौं । हेल्प नेपाल स्पोर्ट्स क्लबले काभा मेन्स भलिबल क्लब च्याम्पियनसिपमा लगातार दोस्रो जित हात पारेको छ ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा आइतबार भएको पहिलो खेलमा हेल्प नेपालले नेपालकै गण्डकी प्रदेशलाई ३–१ को सेटमा हरायो ।

पहिलो खेलमा भारतको क्यालिकट हिरोजलाई प्रतिस्पर्धात्मक खेलामा ३–२ ले पराजित गरेको हेल्प नेपाल २ खेलबाट ५ अंकसहित शीर्ष स्थानमा छ ।

गण्डकीको भने यो लगातार दोस्रो हार हो । गण्डकीले पहिलो खेलमा माल्दिभ्सको एचडिसी क्लबसँग ३–२ को सेटमा पराजित भएको थियो ।

नेपालकै दुई क्लबबीचको खेलमा हेल्प नेपाल गण्डकीमाथि हावी रह्यो । हेल्प नेपालले पहिलो सेट  २५–१४ ले सहजै आफ्नो पक्षमा पार्‍यो । दोस्रो सेटमा गण्डकीले चुनौती दिएपनि हेल्प नेपालले २५–२३ ले जित्दै २-० को अग्रता बनायो ।

तेस्रो सेट भने गण्डकी २५–२३ ले आफ्नो पक्षमा पार्दै खेलमा फर्कने संकेत गरेको थियो । तर हेल्प नेपालले चौथो सेट पनि २५–१६ ले सहजै आफ्नो पक्षमा पार्दै खेल जितेको हो ।

आइतबारै भएको दोस्रो खेलमा इरानको जुनियर टिमले माल्दिभ्सको क्लब एचडिसीलाई प्रतिस्पर्धात्मक खेलमा ३-२ ले हरायो ।

पहिलो खेलमै जितपछि इरानी टिमले २ अंक जोड्‍यो । यस खेलमा १ अंक पाएको एचडिसीले दुई खेलबाट ३ अंक जोडेको छ ।

इरानको जुनियर टिमले क्लब एचडिसीलाई २५-१६, २२-२५, २३-२५, २५-२०, १५-१३ ले हरायो ।

च्याम्पियनसिपमा सोमबार पनि दुई खेल हुनेछ । पहिलो खेल भारतको क्यालिकट हिरोज र माल्दिभ्सको क्लब एचडिसीबीच हुनेछ भने दोस्रो खेलमा नेपालको गण्डकीले इरानको जुनियर टिमसँग खेल्नेछ ।