काठमाडौं । कृषा चौलागाईं निर्देशित मल्टिस्टारर एक्सन ड्रामा ‘पिताम्बर’को टिजर सार्वजनिक भएको छ । २ मिनेट रनटाइमको टिजरले कथावस्तु र चरित्र चित्रणबारे दर्शाएको छ ।

टिजर हेर्दा लाग्छ, ‘पिताम्बर’ बदलाको कथामा आधारित छ । दिव्यदेवले महाभारतको चर्चित उद्धरण ‘यदा यदा हि धर्मस्य…’ वाचन गरेपछि टिजर सुरु हुन्छ । त्यसपछि आउँछन् अनुपविक्रम शाही, सुपुष्पा भट्ट, सुरक्षा पन्त, प्रमोद अग्रहरि, दयाहाङ राई र प्रदीप खड्का ।

दयाहाङ प्रहरीको रोलमा छन् भने प्रमोद खलनायक चरित्रमा । प्रदीपको पात्र प्रतिशोध र बदला लिन चाहन्छ । त्यसपछि आउँछन् सौगात मल्ल, जसको संवाद छ– अब यो प्रचण्ड गर्मीमा शीतलहर चलाउने जिम्मा मेरो ।’ टिजरको अन्त्यतिर खड्का र मल्लको चरित्रलाई आमनेसामने देखाइएको छ ।

टिजरमा दिब्या रायमाझी, रविन्द्र झा, गौरव विष्टको झलक पनि छ । टिजर हेर्दा यो फिल्म एक्सनभित्रको ग्याङस्टर जनरा महसुस हुन्छ । ‘ऐंचोपैंचो’ डेब्यु निर्देशक चौलागाईंको यो दोस्रो निर्देशकीय फिचर हो । उनले यसअघि इन्साफ, कसम हजुरको, के म तिम्रो साथी बन्न सक्छु र पलास निर्माण गरेकी थिइन् ।

केपी फिल्म्स र पुरुषोत्तम प्रधान फिल्म्सको ब्यानरमा फिल्म निर्माण भएको हो । विशाल चौलागाईं निर्माता हुन् । यो फिल्म नेपाली नयाँवर्षको छेकोमा चैत २९ गते प्रदर्शन तयारीमा छ ।