काठमाडौं, २८ पुस । काठमाडौं महानगरपालिकाले ‘स्वच्छ भान्सा’ स्वर्णिम योजना कार्यक्रमअन्तर्गत परम्परागत खाद्य सीप भएकाहरूको सहभागितामा दरबार हाइस्कुलमा आइतबार ‘परम्परागत खाद्य मेला’ को आयोजना गरेको छ ।

भान्सामा सिकेको सीपलाई बजारीकरण गर्ने उद्देश्यले महानगरपालिकाले यस्तो कार्यक्रमको आयोजना गरेको हो । रैथाने खाना बनाउने सीपलाई सरसफाइसँग जोड्ने, सामान किन्दा मिति गुज्रिएको सामान प्रयोग गर्नु हुँदैन भन्ने जस्ता कुराहरूबारे जानकारी गराउन पनि यस्तो कार्यक्रम गरिएको महानगरपालिकाले जानकारी दिएको छ ।

खाद्य स्वच्छताका लागि महानगरपालिकाले प्रदान गर्दै आएको क्षमता विकास तालिममा आज परम्परागत खाद्य सीप भएका मां पुचः, भौ–मचा पुचः, म्ह्याय्–मचा पुचः का करीब पाँच सयको सहभागिता रहेको महानगरपालिकाले जानकारी दियो ।

‘तालिम त अरु–अरुलाई पनि दिएका छौँ । उहाँहरूको सीप घरको भान्छामा मात्रै सीमित थियो । अहिले उहाँहरू विस्तारै बजारमा आउन थाल्नुभएको छ,’ उपप्रमुख सुनिता डंगोलले भनिन्, ‘त्यसलाई व्यावसायिक पनि बनाउन थाल्नुभएको छ । हामीले उपभोक्ता हितको कुरा गर्दा नागरिक सचेत हुनुपर्छ भनेका छौं । त्यसलाई पनि ख्याल गरेर यो तालिम दिएका हौं ।’

उपप्रमुख डंगोलले खाद्य सुरक्षाका लागि तालिम दिइएको जानकारी दिइन् । ‘म विभिन्न कार्यक्रममा सहभागी हुँदा महिला दिदीबहिनी र आमाहरूलाई केन्द्रित गरेर यस्तो खालको तालिम दिन आवश्यक छ भन्ने लाग्यो,’ उनले भनिन्, ‘सोही अनुसारको कार्यक्रम बनाएर हामीले उहाँहरूले बुझ्ने गरी प्रयोगात्मक तालिमको व्यवस्था गरेका हौं ।’

उनले बजारीकणमा पनि सघाउ पुर्‍याउन यस्तो कार्यक्रम आयोजना गरिएको बताइन् । महानगरपालिकाले पहिलोपटक यति धेरैको संख्यामा यस्तो कार्यक्रम गरेको सहभागीहरू उत्साहित देखिन्थे । खाद्य सुरक्षा मेलामा करिब पाँच सयको सहभागिता थियो भने करिब दुई हजारले अवलोकन गरेका थिए ।