१० पुस, नेपालगन्ज । फुटबल संघ, बाँकेको आयोजनामा हुने मेयर कप पुरुष फुटबल प्रतियोगिता माघमा हुने भएको छ ।

माघ ५ गतेदेखि नेपालगन्ज रंगशालामा आयोजना प्रतियोगिता आयोजना हुने फुटबल संघ, बाँकेले जनाएको छ ।

फुटबल संघ, बाँकेका अध्यक्ष भोजराज शाहीका अनुसार प्रतियोगिताको तयारी सुरु भइसकेको छ । यस पटक महिला र पुरुष मेयर कप फुटबल प्रतियोगिता छुट्टा–छुट्टै मितिमा आयोजना गर्न लागिएको उनले बताए ।

‘बाँके जिल्लाभरीको विद्यालयहरूको सहभागीता हुने भएकोले मेयर प्रतियोगितामा पुरुष र महिलाको फरक–फरक मितिमा गर्ने निर्णय गरेका छौं,’ उनले भने, ‘यसले व्यवस्थापनमा पनि सहज हुने र प्रतियोगिताबाट प्रतिभावान खेलाडी छनोटमा सहयोग पुग्नेछ ।’

बाँके जिल्ला फुटबल संघले दुई दशकदेखि मेयर कप आयोजना गर्दै आएको छ । प्रतियोगितामा बाँकेका ८ स्थानीय तहका निजी तथा सामुदायिक विद्यालयहरूको सहभागीता हुनेछ।

‘बाँके जिल्लाको लागि मेयर कप एउटा महत्त्वपूर्ण प्रतियोगिता हो । यसले विद्यालयस्तरका खेलाडीलाई प्रतिभा देखाउने अवसर प्रदान गर्छ,’ अध्यक्ष शाहीले भने, ‘यस प्रतियोगिताबाट बाँके जिल्लाको विद्यालयस्तरको टिम पनि तयारी गरिने भएकोले मेयर कप हाम्रो लागि महत्त्वपूर्ण छ ।’

गत वर्ष भएको मेयर कपको उत्कृष्ट खेलाडीहरूले कैलालीसँग मैत्रीपूर्ण खेल खेलेको थियो ।

मेयर कप फुटबल प्रतियोगितामा करिब ५० विद्यालयको सहभागीता रहने संघले अनुमान गरेको अध्यक्ष शाहीले बताए ।