काठमाडौं । निर्मल पौडेलको लेखन तथा निर्देशनमा बनेको छोटो फिल्म ‘नीलो आकाश’को पोस्टर सार्वजनिक भएको छ । यो फिल्मको शीर्ष भूमिकामा पूर्वमिस नेपाल निकिता चाण्डकले अभिनय गरेकी छन् ।

पोस्टरमा चाण्डकले मधेशकी ग्रामीण महिलाको चरित्र चित्रण गरेकी छन् । पोस्टरले उक्त चरित्रको भावनात्मक संवेदना प्रतिविम्बित गर्ने प्रयास गरेको देखिएको छ । चाण्डकले यसअघि विराज भट्टको ‘साङ्लो’, दीपक रौनियारको ‘राजागञ्ज’ र एक विदेशी फिल्म ‘सेमलेस’मा अभिनय गरेकी छन् ।

‘नीलो आकाश’ भने उनको पहिलो छोटो फिल्म हो । यो फिल्मलाई गाजलु, रोमियो एण्ड मुना, चौका दाउ लगायतका कथानक फिल्ममा सहायक निर्देशन गरेका निर्मल पौडेलले निर्देशन गरेका छन् । पौडेलको यो तेस्रो छोटो फिल्म हो जसमा ‘सिपाहीकी स्वास्नी’ र ‘म कमरेड’ छन् ।

फिल्म ‘नीलो आकाश’ले मधेशकी युवतीको व्यक्तिगत स्वतन्त्रताको कथा भन्छ । पोस्टरमा निकिता चाण्डकलाई मधेशकी विवाहित युवतीको रूपमा देखाइएको छ । यो फिल्मलाई महोत्सवमा प्रदर्शन गर्ने मेकरको तयारी छ । फिल्मलाई काफिया मिडिया र निर्मल फिल्मसको ब्यानरमा बनाइएको हो ।

निर्मातामा आस्था शर्मा र निर्मल पौडेल छन् । सहायक निर्मातामा तेजु पाण्डे, गणेश कञ्चन भारती छन् । छायांकन भारतका दिपङ्कर सिक्दरले गरेका हुन् । सम्पादन अनिमेष सापकोटाले गरेका हुन् ।

रङ संयोजन कपिल पराजुलीले गरेका हुन् । साउन्ड डिजाइन डिकेश खड्गी शाहीले गरेका हुन् । यसमा ब्याकग्राउण्ड म्युजिक उज्ज्वल सागरले गरेका छन् ।