मेलबर्नमा ५२ केजीको बुद्ध मूर्ति प्रतिस्थापन – Online Khabar
मेलबर्न । अस्ट्रेलियाको मेलबर्न शहरमा ३७ इन्च अग्लो ५२ केजीको सुनको जलप लगाइएको बुद्धको मूर्ति अनावरण गरिएको छ ।
लुम्बिनी-कपिलवस्तु विश्व अभियानले हस्तान्तरण गरेको बुद्धको उक्त मूर्ति मेलबर्नस्थित नेपाली मन्दिमा प्रतिस्थापन गरिएको हो ।
तीनजना लामा गुरुमार्फत पूजापाठ गरी बौद्ध परम्परा अनुसार बुद्धको मूर्ति मन्दिरमा प्रतिस्थापन गरिएको अभियानका संयोजक रामकुमार श्रेष्ठले जानकारी दिए ।
उनका अनुसार बुद्धको मूर्ति मन्दिरमा प्रतिस्थापन गर्नुअघि पञ्चकन्या सहितको र्याली समेत निकालिएको थियो । जहाँ सहभागीहरूले बुद्धिस्ट झन्डा, बुद्ध नेपालमा जन्मिएको बारे सन्देश लेखिएको प्लेकार्ड बोकेका थिए ।
अस्ट्रेलियन नेप्लिज मल्टिकचरल सेन्टरका अध्यक्ष गान्धी भट्टराई लगायत अन्य पदाधिकारी भिम न्यौपाने, सुधीर शाक्य, अनन्तराज पौडेल, दीपक आचार्यले बुद्धको मूर्ति सहयोग गरेकोमा अभियानलाई धन्यवाद दिए ।
अभियानको नेपाल राष्ट्रिय समितिका कोषाध्यक्ष समेत रहेका स्व. धर्मबहादुर शाक्यले बुद्धको जन्मस्थलबारे सिर्जित भ्रम निस्तेज पार्न अभियान मार्फत बुद्धको मूर्ति राख्ने चाहना राखेका थिए ।
