२९ मंसिर, काठमाडौं । नेपाल प्रिमियर लिग (एनपीएल)मा शनिबार हुने दोस्रो खेलमा चितवन राइनोज र जनकपुर बोल्ट्स खेल्दै छन् । खेल त्रिवि क्रिकेट मैदानमा दिउँसो १ बजेदेखि सुरू हुनेछ ।

चितवन कुशल मल्लको कप्तानीमा छ भने जनकपुर अनिल शाहको कप्तानीमा खेल्दैछ । चितवन शुक्रबार भएको खेलमा विराटनगरसँग पराजित भएको थियो भने जनकपुरले काठमाण्डुलाई हराएको थियो ।

जनकपुरले प्लेअफ खेल्ने समेत पक्का भइसकेको छ । अब जनकपुरको लक्ष्य भनेको शीर्ष २ मा पर्दै क्‍वालिफायर खेल्ने हुनेछ । यता चितवन भने शुक्रबारको हारपछि जित्नैपर्ने दबाबमा छ ।

जनकपुरले चितवनलाई हराएमा जनकपुरको शीर्ष २ पक्का हुनेछ भने चितवनले अन्य खेलको नतिजा कुर्नुपर्ने छ । त्यसैगरी चितवनले जितेमा भने जनकपुर १० अंकमै सीमित रहनेछ भने चितवनको प्लेअफ सम्भावना बलियो रहन्छ ।

लगातार चार जितका साथ बलियो देखिएको जनकपुरले बुधबार पाँचौं खेलमा नमीठो हार व्यहोरेपछि छैटौं खेलमा काठमाण्डुविरुद्ध जित हात पारेको थियो ।

प्रतियोगितामा जनकपुरको ब्याटिङ र बलिङ दुवै शानदार चलिरहँदा बुधबारको खेलमा भने ब्याटिङ चल्न सकेको थिएन । पछिल्ला तीन खेलमा जनकपुरको ब्याटिङ एक्सपोज भएको छ ।

यता चितवनका लागि विदेशी खेलाडी रवि बोपाराले ब्याटिङमा तथा सोहेल तनविरले बलिङमा राम्रो गरेको भएपनि पछिल्ला खेलमा भने सोचेअनुरूप भएको छैन । चितवनको ब्याटिङ विदेशी खेलाडीमा निर्भर रहेको देखिएको छ ।

नेपाली बलरहरूमा रिजन ढकालले पेस बलिङमा तथा कप्तान कुशल मल्ल र रन्जित कुमारले स्पीन राम्रो गरिरहेका छन् । नयाँ अनुबन्धित खेलाडी बासिद हामिदले पनि १ विकेट भने लिएका छन् ।

चितवनलाई जित निकाल्नको लागि राम्रो ओपनिङ चाहिनेछ भने टप अर्डर ब्याटरहरूबाट पनि राम्रो योगदान हुनु जरूरी छ ।

खेल : चितवन राइनोज र जनकपुर बोल्ट्स

मिति र समय : २९ मंसिर, दिउँसो १ बजे

चितवन राइनोज सम्भावित ११ : बासिल हामिद, विपिन रावल, कुशल मल्ल, हसन एइसाखिल, रवि बोपारा, सन्तोष कार्की, अमरसिंह राउटेला, दीपक बोहरा, सोहेल तनविर, रिजन ढकाल, रन्जित कुमार

जनकपुर बोल्ट्स सम्भावित ११ : अनिल शाह, आसिफ शेख, लाहिरु मिलान्था, हर्श थाकर, अरनिको यादव, जिमी नीशम, जोसुआ ट्रोम्प, शेर मल्ल, ललित राजवंशी, किशोर महतो, शुभ कंसाकार